बघा काहि अनूभवता येत का ते!!!

एखादी गोष्ट आपल्या मनाला भिडते, म्हणजे काय?
एकतर त्या गोष्टी आपल्या आयुष्यात घडून गेलेल्या असतात किंवा त्या गोष्टीत आपण स्वत:ला पाहतो. आणि ज्यावेळी एखादयाची दु:ख मनाला भिडतात त्यावेळी तुमच्यातला माणूस जागा असतो....
बघा काहि अनूभवता येत का ते!!!

1. मी आहेच जरा असा एकटा एकटा राहणारा
   वाळक पान सुध्दा गळताना तन्मयतेने पहणारा
   

2. माझ्या हसण्यावर जाऊ नका,
   माझ्या रूसण्यावर जाऊ नका,
   जरी तुमच्यात बसलो तरी,
   माझ्या असण्यावर जाऊ नका.
   

3. तळ्याकाठच गवत, तळ्याशी सलगीन वागायच.
   कारण त्याला जगायला, तळ्याच पाणी लागायच.
   

4. कालच एका पाखराला, त्याच घरट शोधत भरकटताना पाहील.
   कस सांगु त्याला त्याच घरट ओरबाडून पाडताना मी पाहील.
   

5. सगळीच गावं दूरून सुबक सुंदर दिसतात
   गल्लीतून फिरताना कळत ती विस्कटलेली असतात.
   

6. घराभोवती कुंपण हव, म्हणजे आपल जग ठरवता येत
   बाहेर बरबटलेल असल तरी, आपल्यापुरत सरवता येत.
   

7. जन्मभर जळल्यावर, मेल्यावर पण जाळतात.
   लाकडांपेक्षा माणसच लाकडांचे गुणधर्म पाळतात

एक संदेश

कसं काय चाललयं?
नवीन असं काहीच नाही, कालचचं आयुष्य आज नव्याने जगण्याचा प्रयत्न करतोय, असं काही लोक बोलतात.
कालचचं आयुष्य आज जगता जगता, आजचा काल समोर कधी तरी काळ बनून उभा रहाणार आहे, ह्याची जाणीव ठेवा! प्रत्येक दिवस नव्याने जगणं आपोआप शिकाल!!

प्रश्न...?

प्रत्येकाच्या आयुष्यात काही ना काही प्रॉब्लेम्स. म्हणजेच प्रश्न असतात. आणि आपले आयुष्य त्या प्रश्नांची उत्तरं शोधत असतं. पण उत्तरं शोधायची तर प्रश्नं हरवलेली असतात का?
असं म्हणतात की, आयुष्य एक प्रश्नचिन्ह आहे. मग त्याचं उत्तर मरण आहे का? म्हणूनच लोकं आत्महत्या करतात. प्रश्नांना घाबरुन...
हे प्रश्न पडतातच कसे? आता प्रश्न पडत असतील तर, उत्तरं उभी रहायला हवीत ना! पण नाही, उत्तरे सापडतात म्हणे!! अरेरे!!
ते जाऊ दे! परवा मी माझ्या एका मित्राला सीडी दिली. आणि त्याने ती (त्याच्या मित्राला) अजून एकाला दिली. आता त्याच्या भावाने सीडी त्याच्याकडे मागीतली, तर तो म्हणाला की, "अरे ती माझी नाय रे! दूसर्‍याची हाय!" बघा अजून एक मुर्खपणा! मी सीडी देणारा पहिला, तो स्वतः दुसरा आणि त्याने सीडी ज्याला दिली तो तिसरा, मग तो स्वतः दुसरा असताना त्याने मला, म्हणजे पहिल्याला दुसरा का म्हणाला?
बाय द वे! पकाऊ, भाय, पकवणे, रापचिक, झिंगुर, वंटास हे शब्द आले कुठुन? विरारकडून चर्चगेटकडे की चर्चगेटकडून विरारकडे?

मला जे काही वाटत॑ ते

मला जे काही वाटतं ते आणि "वाट्टेल ते", लिहीण्यासाठी आज हा ब्लॉँग चालू केलायं!
मी जे काही लिहेन, त्यावर "वाट्टेल तो" विचार करावा!

बरं - वाईट
तसं बघीतलं तर आपलं आयुष्य अनेक चांगल्या - वाईट गोष्टींनी भरलेलं आहे. वाईट गोष्टींमुळे त्रास होतो तर चांगल्या गोष्टींमुळे आनंद होतो. पण काळ बदलला आणि आनंदाच्या, दु:खाच्या व्याख्या पण बदलल्या. लोकांना कुठल्या गोष्टीत, कसा आनंद होईल आणि कसा त्रास होईल, ते सांगता येत नाही.
दारू पिणे - वाईट, परोपकार करणे - चांगले, पण का? ही वाक्ये वाचल्यावर तुम्हाला काय वाटते? आणि याप्रमाणे वागायचे ठरवले तर ते शक्य आहे का? लोकांना दारु पिणे चांगले आणि परोपकार करणे वाईट वाटतेयं. आणि शिवाय हे चांगले, हे वाईट हे ठरवलं कोणी?